女人怕自己身型走樣，更怕自己望落去比男友肥！

對唔少女人嚟講，咁樣簡直係惡夢，最衰係愈來愈多香港男人又高又瘦，有啲仲瘦到成條柴，就算實際體重比女友重，望落分分鐘好似fit過女友，搞到做女友嘅鬼咁大壓力，焗住勤力減肥。

雖然話兩個人一齊，唔係話淨睇外表。之不過，如果你遇到上述情況，又好care女朋友感受，又肉赤佢每日只敢食3個蘋果加清水的話，其實係有方法嘅。

就係從衣著入手，改善身型比例，以下5大守則，記得試吓喎！

守則1︰勿著加大碼衫扮「大隻」

好多瘦人都誤解：著大碼，甚至加大碼衫，可以遮蓋自己瘦削身型，望落肥啲，大隻啲。

其實呢個想法好錯，只會帶來反效果，成件事就好似小朋友偷著阿爸件衫，正一「細佬扮大人」，你話幾肉酸。建議著符合自己身型及比例嘅衣服，無謂「死撐」吖。

守則2︰Too loud勿近

想改善身型比例，最有效方法之一係著上印有不同圖案嘅服飾。

例如細格、幼間，製造「肥番啲」嘅錯覺；相反，大格紋或粗條子等過份「loud」嘅圖案，都是瘦人勿近的。

守則3︰同色Tone瘦上加瘦

全身著晒同一隻色，尤其是男人最愛嘅黑色，視覺上只會令你更加瘦。

缺乏顏色或圖案左拼右搭，無氈無扇，想變肥都幾難。所以，無論你為人幾低調，最起碼都要逼自己上半身與下半身穿著不同顏色的衫褲，即使是普通不過的黑撞灰都好！

守則4︰勿掂skinny jeans

話到明skinny，你硬係要著出去俾人知你幾瘦，真係無你辦法囉！尤其擁有一雙「香雞腳」的男士，著上skinny jeans只會顯得「下盤」更加單薄，路人甲乙丙遠睇仲以為你同女友係「好姊妹」shopping！

守則5︰圓領代替V領Tee

你又唔係女人，露出鎖骨與否其實真係無所謂，又唔會畀人睇蝕嘅！

所以，各位男士真係無須特登著件V領Tee，明show你嘅鎖骨。況且，你已瘦蜢蜢，露鎖骨只會增強你的骨感，辜勿論你想令人羨慕或妒忌，唔該換番件圓領衫，遮遮佢啦！拜託！