記得新年嘅時間大陸有單新聞，話有個人揸架Tesla Model S返鄉下，點知去到偏僻農村突然冇電，附近又冇充電站，於是個車主爬咗上就近嘅高壓電纜，直接拉電落黎叉架車。當時個報導仲感嘆話好在中國發展得好，連農村都有電纜；又話如果比著普通汽油車遇上同樣情況就無藥可救喎！真係正面到呢！

唔知係咪Tesla都睇到個報導，於是近日推出嘅軟件更新就為所有Model S(同黎緊嘅X)加入一組號稱「永遠唔會冇叉(電)用」嘅功能！！

咪住先？軟件更新？冇錯，真係唔講唔覺原來依家科技咁發達，連架車都可以好似iPhone咁上網更新有新功能。而Tesla嘅6.2版本軟件多咗兩個新功能，第一個就係「Range Assurance」。

「Range Assurance」者，「保證有電」也。根據Tesla，只要有咗呢個新功能，車內電腦就會無時無刻與Tesla的充電站網絡連線，你一路揸車，佢就幫你計哂最近充電站嘅距離、你剩餘嘅電力，路面嘅高低變化甚至即時天氣，喺你架車捱唔到去最近嘅充電站之前通知你。換言之，除非你有心要仿傚上面嗰位人兄自己爬上電纜拉電而故意無視警告，否則你喺架車冇電之前一定會去到最近嘅充電站。

當然，呢兩項功能之所以可行，係因為美國加拿大、歐洲西、北部已經有相當完善嘅電站覆蓋。而未來12個月中，Tesla嘅充電站網更加會全面覆蓋北美、歐洲、中國沿海地區和澳洲南部。又換言之，喺呢啲地方揸Tesla，本身就唔使擔心會冇電叉嘅，新功能只係幫你更加方便地監控同規畫成件事咁解！之於喺香港啦，目前Supercharge站有4個，但有三個喺港島，一個喺啟德嘅。

目前6.2仲係Beta版，大概再過多兩個禮拜就會正式推出。