呢場波鞋爭霸戰，果然沒完沒了，今次輪到Adidas出招，仲要一次過喪出50隻色，系列名字改得好，叫Superstar Supercolor系列。

叫得做Supercolour，就擺到以顏色取勝，系列中，你講得出嘅顏色幾乎都已經用到，仲要漸變出唔同顏色，其實佢呢招好毒，推出咁多隻色，好等你眼花暸亂，心神彷彿，患有選擇困難症之際，唔覺唔覺就會買多幾對！兼且明知家陣波鞋係現時最hit的fashion item，出價仲一千蚊有找，真係好難忍手唔買番一兩對看門口。

講番今次Adidas，以非常壯觀地嘅姿態一口氣推出50隻顏色嘅Superstar鞋款，推出原因……原來係有背景人士撐腰!?

係呀，位仁兄咪就係由音樂界走入時裝界，無人不曉嘅潮人Pharrel Williams囉！佢之前已經同Moncler、G-Star Raw、Uniqlo，甚至Louis Vuitton都有合作過，與Adidas更加係長期合作伙伴關係。

Pharrel Williams諗到推出Superstar Supercolor系列，最主要原因係想大家真真正正有得揀，唔想來來去去只得小貓三四隻顏色選擇，所以豪氣地將50隻色以show hand形式放係你面前任有你選擇，聽埋潮人Williams點講，「通過多樣的選擇，Supercolor體現平等的喜悅。每一個人也能從50種不同顏色的Superstar中選擇屬於他們的顏色，這比以往任何一個系列提供更多的選擇，也更具個性，選擇屬於你的顏色，Choose Your Color。」

Supercolor系列將於3月27日，即今個星期五開始作全球限量發售，每對定價$799，呢個價位呢講真係非常吸引！