改編自George R.R. Martin史詩奇幻長篇小說《冰與火之歌》嘅《Game of Thrones》，可以話係美劇史上重要里程碑之一，粉絲遍佈全球各地，每集都大灑金錢當成電影咁拍，（曾經）係唔少人心目中嘅神作，可惜就因為最後嗰幾季拍得太爛而引起粉絲不滿，更有人喺網上發起聯署要求HBO重拍第8季。事隔兩年，近日George R.R. Martin就坦言冇諗過劇集會拍得快過佢寫小說，甚至到後期直頭超越埋咗佢，令到劇情走向變得好奇怪，並承諾當佢寫完本書，大家就會見到不一樣嘅結局。

近日George R.R. Martin接受WTTW Chicago訪問時表示，「當HBO製作《Game of Thrones》嗰陣，我已經有四本書，而第五本亦都喺劇集播出嗰陣出版埋。你都知啦，我每本書都係好厚嘅長篇小說，我從來冇諗過劇集會追得上我寫作嘅速度，但佢哋唔只追得上我，仲要超越埋我。導致後期劇情走向變得好奇怪，朝向一個節然不同嘅方向發展。」雖然Martin一直有向劇組提供結局嘅諗法，但劇集最後結果係點大家都有目共睹，佢就承諾小說嘅結局將會有所不同，等佢寫完本書大家就可以見到「Martin版」結局。

值得一提嘅係，George R.R. Martin上一本書已經係2011年出版嘅《魔龍的狂舞》，距離至今將近10年仍然未出版第6本作品《凜冬的寒風》，睇嚟佢嘅拖稿速度同富奸有得揮。咁當然唔排除係因為劇集出街後反應太好，搞到佢都唔敢輕易落筆，深思熟慮多年先決定好點樣寫埋落去，佢亦表示如果進度良好，今年內應該就可以寫完。

純屬猜想：唔知《Game of Thrones》係咪可以好似《鋼鍊》動畫咁呢？由於當年03年版《鋼鍊》動畫出得快過原著漫畫，製作組就自行腦補後續劇情，製作出另一個平行時空，後來先出返忠於原著嘅《鋼鍊FA》。如果HBO等Martin寫完本書再拍返套「Martin版」《Game of Thrones》結局，各位又會唔會期待先？