英國首相約翰遜於週一宣佈，英國政府希望於7月19日起解除包括社交距離、限制人群聚集、以及強制戴口罩等防疫限制。換言之戲院、夜店、餐廳等店舖都能夠正常營業，運動比賽、演唱會等亦將能正常舉行

約翰遜於週一宣佈，英國政府目前希望於7月19日起撤銷所有法例規定嘅防疫措施，並於下週內作出最終決定。一旦解除防痠措施，代表戲院、劇場等地唔再需要遵守「最少一米距離」嘅規矩，簡單黎講即係可以坐滿人；市民去夜店、餐廳時亦唔需要登記資料，亦唔再需要按法例規定戴口罩，一句講哂就即係回復疫情前嘅正常生活。

約翰遜表示「我哋必須要對自己誠實，如果喺未來幾個星期，又係夏天、學生又放暑假嘅情況下，我哋都唔能夠重開社會嘅話，咁我哋真係要問下幾時先可以回復正常？而如果我哋依家唔嘗試重開，過多排冬天又黎，咁今年就唔使開啦。」

據英國政府嘅數據，目前全國已有86%成年人注射咗第一劑疫苗，有64%已經注射埋第二劑。而黎緊40歲以下人士喺接種第一劑之後，最快等8個星期就可以打第二劑，比起目前要等12個星期更快。

雖然約翰遜話會撤銷一切法例要求嘅防疫規定，但佢亦提醒國民「疫情有排都未完。而且明顯地，如果又出現一隻疫苗防唔到嘅變種，我哋都係要用盡所有方法去保護大眾。」