今年2月日本三重縣鈴鹿市一個十字路紅綠燈離奇倒塌，但幸好事發位置喺郊區，所以冇人受傷。由於盞燈只係用咗23年，距離預期壽命50年一半都冇就冧咗，警方隨即接手調查懷疑有人故意破壞，但最後發現元兇竟然係「狗尿」！

日本警方調查期間發現附近大量居民都有放狗習慣，而且好多時候狗狗都會喺電線桿、燈柱旁邊屙尿，於是警方就開始從狗尿方面著手。經過三重縣警察科學搜查研究所檢測後，發現燈柱斷裂位置尿素含量比起其他燈柱高出42倍，就連柱身尿素亦高出8倍，從而推斷狗尿入面嘅鹽分加速燈柱腐蝕而導致折斷。

事後警方同專家都呼籲民眾帶狗狗出門散步之前要清空大小便，同埋帶定支水出街，就算狗狗屙完尿都可以用水沖洗一下，減少對公共設施損壞。唔知香港啲燈柱會唔會同樣咁「化學」，被狗狗屙吓尿就冧呢？