傳說中嘅AE黑卡（American Express Centurion Card），向來都係被視為財富及身份地位象徵。皆因呢張卡冇得主動申請，當客戶「極度有錢」嗰陣就會被邀請加入，其特點在於無簽帳上限任你碌，基本上用嚟碌部飛機、遊艇、跑車都冇問題，而且仲會有一位24小時專屬客戶經理照顧日常所需，據傳輕則可以幫手搞婚禮，重則聯絡軍隊救人都得，包保使命必達。最近AE就聯同建築師Rem Koolhaas以及藝術家Kehinde Wiley合作，推出兩款全新設計「黑卡」。

普立茲克建築獎得主兼OMA Design Group創辦人Rem Koolhaasz，被譽為係當代建築教父級人物，就連已故知名女建築師Zaha Hadid都係佢門生，全球各大城市都可以見到佢嘅作品，例如K11 MUSEA正門前嘅咖啡廳KUBE、北京中央電視台總部大樓、美國西雅圖中央圖書館、台北表演藝術中心等等。今次Rem Koolhaasz用上嘅抽象圖案，就係源自一個未有機會落成嘅項目「Boompjes」，該項目旨在重建遭到二戰破壞嘅荷蘭城市Boompjes（鹿特丹），但因為當年提案「走得太前」而未獲當地政府採用，今次用上「Boompjes」除咗呼應「致力改善生活」，亦係向80年代嘅OMA發跡地Boompjes致敬。

另一個設計就係由黑人藝術家Kehinde Wiley操刀，以精緻畫風聞名，擅長將Hip hop及古典元素融合，曾畫過奧巴馬、Michael Jackson等黑人名人。今次同AE合作所用嘅植物圖案，就係源自過去一幅為非裔女性發聲嘅作品《Princess Victoire of Saxe-Coburg-Gotha》。

除咗新卡面設計，AE亦同Parda合作推出「皮革手環」，將卡片轉化為穿戴飾物，整體採用防刮Saffiàno 黑色皮革製成，內部藏有支付晶片。