一場足球賽事最重要的人係邊位？答案係球證，無論世界上任何足球比賽，球證主導比賽，所以球證點樣吹雞就成為比賽關鍵。好多人奇怪點解足球遊戲代代有，但玩做球證的足球遊戲又無咩幾多，終於有知名模擬遊戲公司The PlayWay 係 Steam 登錄一款新作名叫《Referee Simulator》，正正讓大家過一下做球證的癮，你鐘意公平嚴明定亂雜咁吹隨得你，不過球員會引發不滿，嚴重時甚至會引發全武裝球場大毆鬥，腰斬比賽。計我話呢啲先好玩，我就係要呢啲。Fifa 22就應該出埋球證玩法，想像下如果未來有機會22人網上(online)踢波，搵多個朋友做球證，吹主場雞幾咁好玩！

講返呢個電腦模擬遊戲，佢係一個好認真的足球模擬作品，你要好好扮演足球裁判角色。呢個《Referee Simulator》遊戲中要做好球證並不容易，睇返遊戲宣傳片中， 玩家扮演嘅球證需要根據球賽進行過程吹雞，仲要全場追住個波跑，根據官方資訊，遊戲會係場上紀錄玩家所有的吹雞判決同跑步距離，而玩家扮演的球證有體力值，一旦追不上球員，就無法第一時間睇到球賽發生的狀況，於是有可能會出現誤判的情況。除左體力值仲有球賽重視度以及壓力指數，如果其中頭兩者野跌到極低或無將會引發球員或比賽問題，壓力過高同樣會引發球員不滿！想點樣吹好一場賽事就悉隨專便！最簡單一般的越位或推人犯規，身為球證就要係場上發號施令吹雞判別，對球員出示黃牌警告或是紅牌判罰出場。你可以靠自己雙眼做證據同時也可以透過錄影畫面檢測睇睇有無錯判，當然你鐘意錯判暗黑玩法係另類樂趣！

 睇返雖然呢個作為模擬遊戲，但遊戲的本意似乎也不在於認真模擬，反而係搞笑成份仲居多。老實講呢個遊戲要紅起來要流行就唔容易，只是想信好多人同我一樣覺得做球證的遊戲實際上應該大有可為！今次介紹呢個《Referee Simulator》上架時間未定，究竟遊戲會不會順利上架出售仲要觀望一下，有興趣玩家請繼續關注。其實我最希望大廠如Fifa等下一代可以加入做球證呢個第一人玩法，咁就「完美」、「有趣」、「神奇」、「頂級」、「超卓」！