今屆東京奧運香港隊成功取得歷史最佳成績，政府就梗係第一時間出黎支持運動員，但係承諾左就疑似走數。可能有人話政府已經比左好多錢出黎支持體育項目，但事實上唔少項目獲得嘅資源甚少，特別係非精英項目及非奧運項目。

究竟投放資源喺運動項目上，應該係有雞先定有蛋先? 應該係運動員交出好成績先針對性投放資源，定係先投放資源令培訓質素提高，讓運動員實力更出色? 呢個答案相信我地嘅政府已經話左比大家知。

而其中網球運動，喺世界黎講可能唔及足球、籃球咁多人睇，但係仍然係世界最受歡迎嘅運動之一，你睇費達拿、拿度同埋祖高域呢三位球王人氣幾高就知。相反香港嘅網球運動可能都有唔少人玩，但實力就上唔到世界舞台，其中場地問題可能係其中一個原因。

喺香港，99%網球場都係硬地場，頂盡係草地，泥地場? 真係好似無見過，原因係泥地場嘅保養成本極高，喺香港無乜人肯投放呢個資源，包括政府。

不過近日香港竟然有人肯投資設立一個室內泥地場，令港人有機會親身體驗成為「泥地王」嘅感覺。由One Affinity Tennis Experience Centre開立位於觀塘嘅全球首個唯一公開室內泥地網球體驗中心，佔地5000呎，配備兩個半CaliClay 泥地場、Tennispot網球模擬器、一個體能訓練健身室，以及一個提供全系列網球裝備嘅專賣店。

以往「泥地場」都係用磨成粉嘅貝殼、石頭、磚頭鋪成，保養比硬地麻煩得多，又唔可以太乾，又唔可以太濕，需要經常碾壓令場地平整，唔用個陣又要蓋上帆布，以防大風吹走泥土。但今次呢個泥地場就結合從專用礦山特別開采嘅玄武岩及 NextGen 天然泥土，令場地表面更柔軟，對身體不會作出太大負荷。

與傳統泥土相比，CaliClay 天然泥土需要好少嘅保養及灑水，就連「泥地王」拿度，其訓練學院都使用上CaliClay泥土的，所以可以想像得到其質素有幾出色。