有「港版GTA」之稱嘅開放世界動作遊戲《Sleeping Dogs》，唔經唔覺就推出咗近10年，相信玩過嘅朋友都仲記得「等我話你知咩叫眼前一黑啦！」、「睇路啦盲X」、「嚟啦牙籤仔」等精警對白。雖然開發商已解散，遊戲續集應該唔會有㗎啦，不過幾年前就有荷里活公司打算改編成電影，並由武打明星甄子丹主演，講咁多年最近終於有新消息！

近日甄子丹宣傳香港已故導演陳木勝遺作《怒火》接受外媒Collider訪問，期間被問到《Sleeping Dogs》製作進度時，佢就表示：「我目前同製片人Neil Moritz、Toby Ascher以及幾個平台傾緊合作，希望最快喺2023年上半年開拍，並深信每部電影都有佢嘅命運。」

另外甄子丹亦提到自己有《Sleeping Dogs》電影嘅製作權，目前佢哋仲考慮緊將遊戲照辦煮碗改編，定抑制係借用當中元素創作原創故事，不過佢就認為電影版將會比原作更現代同前衛。

資料來源：Collider