於SEGA任職近32年嘅名越稔洋，因製作《超級猴子球》、《人中之龍》系列聲名大噪，經常出席遊戲宣傳活動，係公司靈魂人物之一。不過，近日Bloomberg引述消息人士報導，指中國網易為咗扻贏競爭對手騰訊，目前招攬緊名越稔洋跳槽。若然事成，佢最快會喺9月24日《審判之逝：湮滅的記憶》發售後過檔網易。

據報導所指，騰訊及網易為咗突破中國政府限制開拓國際市場，近年收購大量日本動畫、漫畫以及遊戲IP，並積極吸納日本遊戲人才，藉此進軍全球。據知情人情透露，網易最近打算招攬SEGA著名製作人名越稔洋過檔，並預計佢將會帶領一個專屬團隊創作全新作品，不過目前就未知雙方簽咗約未。Bloomberg亦就有關傳聞分別向兩間公司查證，但網易就冇任何回覆，而SEGA就話唔評論個別員工就業情況。

「芝士牛丼」係日本網絡用語，用嚟笑鍾意食/睇落會叫芝士牛丼嘅人係內向、陰沈、宅男等等。

由於名越稔洋喺上年公開取笑《魔法氣泡》電競選手ともくん睇落鐘意食「芝士牛丼」（日本網絡用語，用嚟笑人係宅男）而引起爭議，結果搞到冇得再做SEGA董事同首席內容官（CCO），得返創意總監一職，唔少網友都認為呢件事同過檔傳聞有所關連。