曾經風靡一時嘅任天堂掌機GBA，相信係唔少朋友嘅童年回憶，仲記得當年未有SP版（正方型摺機）嗰陣，夜晚唔開燈係打唔到機！最近兩位嚟自英國嘅開發者為慶祝GBA問世20周年，喺Kickstarter發起眾籌宣布推出新作《Goodboy Galaxy》，短短幾日就籌得8.5萬英鎊，遠超原定目標1.8萬近5倍，可想而知大家對GBA仍然念念不忘。

據官方介紹，《Goodboy Galaxy》係一款橫向動作遊戲，靈感嚟自《銀河戰士（Metroid）》系列及《洞窟物語（Cave Story）》，玩家將會扮演一隻叫Maxwell嘅可愛狗仔展開冒險，遊戲包含探索、解迷元素，而且仲可以同NPC互動。

隨住眾籌金額達標，英國獨立開發者Rik Nicol及Jeremy Clarke將會推出GBA實體遊戲卡帶、貼紙、遊戲說明書等等，滿足一眾機迷情懷。另外遊戲亦會登陸Switch及PC（Steam）平台，就算冇GBA嘅朋友都可以玩得到。GBA版預計2023年3月正式上市，而Swich及PC數位版就預計2022年12月上市。