| 前日愚人節，唔少大品牌都泡製咗啲假產品消息出嚟應節，其中絕大部分都係笑完就算，過咗愚人節就唔值得再講番，但係呢一單就唔同，因為有一半係堅嘅，就係1:1超級雷神會喺今年誕生！ | |
| |
| 其實呢單料，我哋上年年尾都已經報道過，《高智能方程式》fans一定會記得！不過呢次嘅愚人節玩笑，就令大家知道更多詳情。成件事就係出緊Cyber Formula Variable Action Series模型車嘅Megahouse搞出嚟，佢哋喺愚人節當日聲稱已經成功製造咗1:1嘅超級雷神，並且老吹會商品化量產發售，仲話會預先搞個體驗會，畀fans試坐，感受一下Zero領域！ 當然，單嘢吹到咁大，fans應該一睇就知係愚人節玩笑啦，但係我哋都有得着嘅，就係從Megahouse發布嘅「假圖」當中肯定，即將會展出嘅1:1超級雷神車款，就係TV動畫入面嘅Super Asurada 01。小編覺得咁多架雷神，最靚始終係呢架！ | |
| |
| 另外，1:1超級雷神展出嘅日期同地點，亦已經正式公布咗，就係今年5月30日喺秋葉原舉行嘅「メガホビEXPO2015 Spring」。Die hard fans到時真係可以飛過去朝聖喎，不過呢個show嘅展期好短，相信日後應該仲會喺其他地方展出更長時間。 嫌小編長氣都要再講多次，整呢架1:1超級雷神出嚟，係為咗慶祝2015年係《高智能方程式》TV動畫嘅設定年份。而Megahouse點解咁積極咁做，最大可能嘅目的，就梗係想谷佢哋啲Cyber Formula玩具啦！ | |
