文:MenClub 魏文青  
POSTED ON March 29, 2022 6:30 pm

相信唔少男人都有「儲嘢」嘅習慣,而其中最常用黎說服自己 (同老婆) 嘅理由,就係「當傳家之寶傳畀個仔,幾廿年之後就值錢啦!」而日本男子偶像團體「Snow Man」嘅成員佐久間大介,日前就拎咗張視為傳家寶嘅初版青眼白龍上節目,結果差啲被節目主持人拎走,然後又差啲被拎去送畀觀眾,傳家寶之夢差啲就冇咗。

圖片:截圖自TBS

卻說由櫻井翔及搞笑藝人有吉弘行主持嘅《櫻井・有吉THE夜会》日前邀請「Snow Man」全員參加室內賞櫻會,並要求成員們都帶份禮物黎畀主持人揀,結果當其他成員都拎啲衫褲鞋襪、耳機、暖爐等生活用品上黎時,本身就係一個宅男嘅佐久間大介竟然拎出一張初版青眼白龍,仲向在場所有人解釋張卡有幾咁罕有、擁有佢係幾咁把炮,更直言一定係全場最值錢嘅禮物 (初版青眼白龍曾經賣出數十萬Yen,的確好可能係全場最值錢嘅禮物)。佐久間大介話,其實佢冇打算真係送張卡出去,而係覺得兩位主持一定唔會揀呢份禮物,只係借個機會拎張卡去黎炫耀一下。

圖片:截圖自TBS

圖片:截圖自TBS

點知佐久間大介Sell得太落力,主持人有吉弘行就故意話要揀張卡,雖然最後冇揀到,但當該集特別嘉賓田中卓志揀禮物時,佢就二話不說將張青眼白龍袋入褲袋,搞到佐久間大介高呼「我諗住用黎做傳家之寶架!」好彩最後田中卓志都揀咗其他禮物。正當佐久間大介以為逃過一劫時,節目組就公佈,冇被人揀走嘅禮物都要放上網畀觀眾抽獎,搞到佐久間大介抱頭苦笑:「我唔應該帶佢黎!」

不過於節目抽獎網站上,就寫到明「遊戲王卡係私人物品,所以不屬獎品之一」,佐久間大介再逃過一劫。我估短時間內佢都唔敢再拎張青眼白龍出黎啦。