日本演藝圈近日爆出多宗「潛規則」醜聞，而繼導演榊英雄、男演員木下鳳華之後，昨日《週刊女性》又爆出著名電影導演園子溫，以「試鏡」為藉口威逼女演員發生性行為，據知園子溫更曾炫耀「我對所有電影女主角都出過手」。結果園子溫今日以親筆信認錯，但就話事實與報導不符。

園子溫

圖片：Wikipedia

據《週刊女性》報導，一名曾經出演園子溫作品嘅女星A透露，園子溫曾向佢表示「每個女人黎搵我都係想得到工作」，更誇口「所有我拍過嘅女主角幾乎都有出手」，仲話某位女演員係靠佢先可以走紅，「但佢後尾跟咗第二個男人，我被拋棄了。」

翻查園子溫作品，佢曾經與多名當紅女演員合作。淨係數主要角色都有池田依來沙與真野惠理菜 (2015《我們都是超能力者》)；德日混血模特兒特林德爾·玲奈及篠田麻里子 (2015 《奪命捉迷藏》)、澤尻英龍華 (2015 《新宿天鵝》)、二階堂富美 (2013 《地獄為何惡劣》) 等。其中真野惠理菜與二階堂富美均與園子溫多次合作。

池田依來沙

真野惠理菜

特林德爾·玲奈

篠田麻里子

二階堂富美 

而另一位女星B就曾經親自經歷園子溫嘅惡行。佢話自己與園子溫於某個活動中認識，大家交換咗LINE，然後某日園子溫約佢去參加一個酒局，期間園子溫就話「我曾經對眾多女演員出手，而我掂過女演員嘅都會畀工作佢，呢個係我同其他導演唔同嘅地方。」後來園子溫再約B去某間酒店，而B就抱住「要成為知名演員嘅必死決心」赴約。去到酒店後圓子溫同佢講「如果你男朋友，你就打電話同男朋友講你病咗」，當時B回答「我冇男朋友，你幫我搵一個啦」然後二人就發生關係。據B回憶指，園子溫嘅性癖係唔做任何避孕措施。

值得一提嘅係，B最後亦真係得到園子溫提供嘅工作。而事後園子溫亦曾多次聯絡B，但B回覆「目前有嘢做緊」後，園子溫就唔再搵B。

園子溫親筆信

而另一名女演員C就曾經被園子溫以「睇下我嘅帽收藏」為名試圖帶入房，本有防備嘅C一直都企喺房門唔肯入去，但就被人強行推上床，園子溫立即跨坐於C身上，強吻、舔頸、摸胸，「他的身體壓上我的跨下，手從衣服領口伸入」最後C強行掙扎逃離。後來園子溫繼續有聯絡C，並會傳「想舔」等訊息畀C。

事件被爆出後，園子溫嘅經理人公司發文致歉，並指會了解詳情後另發聲明。園子溫就於今日發出手寫公開信，信中話自己「缺乏身為電影導演嘅自覺，冇顧及身邊嘅人，將重新思考處事態度」，但亦話週刊發表嘅內容「與事實有很大出入」，未來或會採取法律行動。

資料來源：週刊女性