隨住Pixar動畫《光年正傳（Lightyear）》將於6月16日上映，噚晚官方再公布新預告，揭露更多劇情，今次似乎係玩穿越時空！

從預告片得知，巴斯同同伴們被困於陌生星球足足一年。為尋找出路，巴斯攜同機械貓執行特別飛行任務，但期間似乎發生意外，導致短短幾分鐘嘅航程，喺星球上就渡過將近63年。巴斯重返地面後恍若隔世，昔日指揮官兼好友Alisha Hawthorne亦都唔喺到，改由佢孫女Izzy Hawthorne繼任。與此同時，天空上又出現神秘太空船入侵，巴斯將會聯同夥伴們一齊大戰索克天王以及各種邪惡機械人。

《光年正傳》Pixar及迪士尼共同製作，《海底奇兵2》聯合導演Angus MacLane執導，《Soul（靈魂奇遇記）》導演Pete Docter撰寫劇本，旨在講述玩具巴斯光年原型人物嘅起源故事，一位年輕飛行員如何逐步成長，最終成為太空戰士嘅奮鬥經歷。

由於新作同《反斗奇兵》世界觀無關，而且片中嘅巴斯更為後生，所以今次配音員由過往嘅Tim Allen改為「美國隊長」Chris Evans。暫時未知粵語版係咪依舊搵返劉青雲聲演，唔係嘅話又會搵邊個呢？唔通係網友呼聲最高嘅鄧梓峰！