記得細個讀書時，數學老師用咗成堂時間黎介紹平均數 (mean)、眾數 (mode) 及中位數 (Median)嘅差別，當時我心諗「咪又係表達緊個中間值，使咩分到咁清呀？」但日前一名研究日本文化嘅Twitter用家，就完美地展現咗錯誤運用統計學概念會發生咩事。

日本人の睾丸所持数を年齢別のグラフにしました。
平均的な日本人は1.02個の睾丸を持って出生し、中年以降になると所持数が徐々に下がっていきます。全年齢平均は0.97個です。
中央値は出生から還暦まで2個で、それを過ぎると0個に急減します。中央値で代表させた日本人全体の睾丸所持数はゼロです pic.twitter.com/EjkqcqciIV

— 浜尻六彁 ???????? はまじり ろっか (@qlocka) April 16, 2022

Twitter上嘅「浜尻六彁 ???????? はまじり ろっか (@qlocka)」於上週貼出一張「按年齡分佈日本人擁有睪丸數目」嘅統計圖，圖中分別列出不同年齡層嘅日本人，以及日本人口整體擁有嘅睪丸數目平均值及中位數。當中顯示由0-59歲嘅日本人平均擁有大約「1.02粒睪丸」，然後數值於60歲開始下降，到100歲以上人均「只有」0.24粒睪丸。如果睇中位數就更加神奇，直到59歲「睪丸中位數」都係2，但一到60歲就跌到0，甚至全國中位數都係0，搞到全日本人好似冇睪丸咁。

圖片：浜尻六彁 ???????? はまじり ろっか (@qlocka)

實際上，「浜尻六彁 ???????? はまじり ろっか (@qlocka)」就係想用呢張「荒謬」嘅圖，展示運用錯誤統計方法去演繹數據嘅後果。實際上日本絕大部份男性都係擁有兩粒睪丸嘅正常人，但由於「人口平均數」係會將女性計埋入去，而59歲以下年齡層係男性稍多，所以「每人平均」就會有「一粒多啲」；而到60歲後，由於女性普遍較為長壽，所以女性佔比會增多，「每人平均睪丸數就會下跌」。同樣道理，「中位數」係指將所數據順序排好後，排於正中間位置嘅數值，所以於男性較多嘅59歲以下組別，排中間嘅會係一名男性，睪丸中位數就係2；60歲後女性佔多數，排中間嘅係女性，睪丸中位數就會係0。

呢張圖之所以成為日本Twitter熱話，除咗因為「日本人睪丸中位數係0」夠搶眼之後，亦因為佢提醒咗大家對於任何圖表、統計都要帶著批判性眼光看待。數據或者唔會呃人，但運用數據嘅人可能會。