【世紀冤家聚頭？】印尼邀請烏克蘭總統澤倫斯基出席11月20國集團（G20）峰會普京將同場

從來教授教落政治一日都嫌太長，更何況要等到11月份！可能到時已經有翻天覆地甚至陰陽相隔新局面。話說烏克蘭總統澤倫斯基今日係推特發文表示印尼總統佐科威已經邀請佢參加今年11月係印尼舉辦20國集團（G20）峰會，而當中俄羅斯方面早前已講過總統普京已計畫參加這場峰會。如果真係有機會俄烏兩位總統直接同場開20國集團（G20）峰會，場面真係不敢想像，但到11月可能已經塵埃落定！

印尼目前係G20輪值主席國，將會係11月份召開20國集團（G20）峰會，而澤倫斯基（Volodymyr Zelensky）推特表示：「同佐科威（Joko Widodo）總統進行對話…感謝邀請我參加G20峰會。」澤倫斯基並沒有證實佢是否會接受邀請參加11月在印尼峇里島（Bali）舉行的G20峰會。俄羅斯方面已經指出，俄國總統普京（Vladimir Putin）計畫參加峰會。而印尼總統府同國務秘書處辦公室都未有立即回覆路透社對於前述消息的提問。

烏克蘭並非G20成員國，但過往都曾經有G20主席國邀請其他國家與會。烏克蘭財政部長就於上星期參加係美國華府舉行G20財政官員會議。世紀大碰面有無機會出現，首先就要先面對面前的戰事，可能係一個月，可能係一星期，都可能係1日就有截然不同戰況！如今面前最大焦點係俄羅斯打算係5月9日於馬里烏波爾市內舉行勝利遊行預祝獲得全面解放馬里烏波爾。不過正因為呢個目標死線，俄羅斯軍隊似乎進退失據， 迫切求勝反而陷入兩難當中！一於睇睇5月9日俄羅斯點樣Book定巴士表演「勝利大巡遊」！！