近年多部Marvel電影無緣中國市場，唔少網民都認為背後原因同《尚氣》及《永恆族》涉嫌辱華有關，搞到連唔多關事嘅《蜘蛛俠：不戰無歸》亦無份上映。不過，最近有業內人士爆料，《不戰無歸》無法過審其實係同「自由神像」有關！

近日《The Hollywood Reporter》前編輯Matthew Bellon爆料，指中國有關當局喺審查期間曾要求SONY剪走「自由神像」畫面，就算無法刪減，都希望剪走Tom Holland企喺神像冠冕嗰幕，又或者將畫面調暗，令神像睇落冇咁顯眼。但有睇過《不戰無歸》嘅朋友都知道，電影高潮部份正正發生喺自由神像，要刪減嘅話確實有難度。

Matthew Bellon亦提到，SONY確實有考慮過接受有關要求，但一諗到咁做可能會引起美國及其他地區影迷不滿，招致嚴重公關災難。況且修改完，都唔能夠保證喺中國順利上映，並取得亮麗票房成績，所以最後決定放棄中國市場，

雖然《蜘蛛俠：不戰無歸》無緣中國市場，但開畫唔夠兩個禮拜就成為年度票房冠軍，最終大收近19億美元，榮登史上最高票房電影第6位。