早前同大家提及過，曾執導《Fast and Furious（狂野時速）》系列第3、4、5、6、9集嘅林詣彬導演，喺《Fast X（狂野時速10）》開拍一個禮拜後突然劈炮唔撈，並出咗篇聲明感謝各位一直以嚟嘅支持，表示好開心呢10年嚟能夠同一流嘅演員合作，拍出最好嘅特技及飛車畫面...(都係嗰啲客套說話啦)，惟獨冇透露辭職具體原因。當時外媒《Deadline》就指出，林導係因為同片商環球影業出現「創作分歧」先唔撈。不過，最近另一間外媒就有新說法！

日前外媒《New York Daily News》引述知情人士消息，指林詣彬劈炮嘅真正原因其實係Vin Diesel工作態度惡劣，經常遲到、唔記得台詞、身材走樣，令林導情願放棄1000至2000萬美元片酬，冒住名聲敗壞風險，甚至已經開拍一個星期都要臨時劈炮，其中一位資深電影製作人亦表示情況實屬罕見。

實際上，Vin Diesel都唔係第一次被人話工作態度惡劣。早喺2017年《Fast & Furious 8》拍攝期間，Dwayne Johnson（The Rock）曾經喺IG不點名批評有位男演員係「Candy Ass（膽小鬼）」，唔似一個真人嘅男人及專業演員。當時大家都認為佢係暗串緊經常遲到Vin Diesel，兩人亦從此鬧翻。