作為一個貓奴，你去叫主子但主子明明聽到都唔應你，係一件非常合理嘅事。但主子唔理你，好有可能唔係因為聽唔明你講咩，而係根本就唔想理你。因為據日本一個研究發現，主子們好可能係知道同一屋簷下嘅其他貓叫咩名。

測試人類嬰兒嘅認知能力時，有一個方法係播放圖像畀個BB睇，同時播放聲音黎描述圖像，而如果BB係認得圖像入面嘅嘢 (例如媽媽)，同時聽得明聲音係講緊另一樣嘢 (例如蘋果) 時，就會因為唔理解圖像與聲音中嘅關係 (「點解會叫媽媽做蘋果呢？」)，而花更長時間望住張圖。

而來自日本麻布大學嘅特別研究員高木佐保早前就用一個方法測試主子們。佢從飼養咗三隻貓或以上嘅家庭，搵黎19隻主子，並向主子展示同佢一齊住嘅其他貓照片，同時播放出不同貓名，結果發現當播放出黎嘅貓名，與相中嘅貓樣不符之時，主子平均會用多一秒黎望住張相。

另外研究員亦用同樣嘅方法，出示貓奴嘅照片並叫錯貓奴個名，但就搵唔到主子有特別反應。不過佢話如果屋企嘅貓奴人數越多、飼養隻貓嘅時間越長，主子就越有機會知道主子叫咩名。

高木佐保嘅結論，就係主子們其實係知道同住嘅其他貓叫咩名，換言之佢哋對人類語言其實係有一定理解。當然，主子聽得明係一回事，聽唔聽你支笛又係另一回事啦。

資料來源：nhk