唔少科學家、甚至首富Elon Musk都曾經講過，全球出生率普遍低下，會係人類文明未來數十年中必須要解決嘅問題。近日中國上海社科院就公佈研究，指出中國人口峰值或會比預計早十年到達，然後總人口數目就會掉頭向下，到世紀末時中國更有可能只餘不足6億人，即係比依家少六成。

圖片：The Conversation

中國國家統計局早前公佈人口數字，指全國總人口由2020年嘅14.1212億，微增48萬至14.1260億，生育率 (即每位女性生幾多個嬰兒)只有1.15，比起出名人口老化問題嚴重、人口已經減少緊嘅日本 (1.3) 都仲要低，換言之中國即將自上世紀60年代嘅大飢荒後，首次迎來人口下跌。值得一提嘅係，2019年中國社科院及聯合國人口展望，都估計中國人口要到2029-31年先會到達峰值，亦即中國人口下跌問題比預期早10年出現。

上海社科院估計，如果由2021年起，中國人口以每年1.1%下跌，到2100年時中國總人數只餘5.87億人，比起依家下跌近六成。

圖片：The Conversation

生育率下跌，會令未來勞動人口減少，陪隨住大量人口老化，就會對社會造成壓力。上海社科院指出，中國勞動人口 (即15-64歲人士) 已經於2014年到達頂峰，而高齡人口就會逐步上升，到2078年左右，高齡人口就會正式超越勞動人口，換言之令名勞動人口平均要供養多過一名老人，到2100年時每名勞動人口更要供養1.2名老人。勞動人口減少亦意味住薪酬上升，最終會將需要大量平價勞動力嘅製造業推離中國，前往越南、印度等國家尋求更低勞動力成本。