由日本東映製作嘅《幪面超人》於1971年開始播映，亦即上年就已經迎來50週年紀念。而除咗預計於明年3月上映，由庵野秀明做導演嘅《新．幪面超人》電影之外，近日東映YouTube亦開始另一個50週年企劃，就係重播「初代拉打」！

由香港時間今晚 (星期三) 起，東映特撮嘅官方YouTube就會於每個星期三晚上八點，免費重播由藤岡弘、(當時仲係叫藤岡邦弘) 飾演主角本鄉猛嘅《幪面超人》，而且一晚會播兩集。今晚會播嘅就係第一集《怪奇蜘蛛男》以及第二集《恐怖蝙蝠男》，對於想重溫經典嘅老「拉打迷」，又或礙於年紀所限未睇過初代拉打嘅年輕Fans們黎講，都係補完嘅好機會。

《幪面超人》講述IQ600、身手敏捷嘅本鄉猛被撒旦幫擄走，再被改造成人有蝗蟲能力嘅改造人，幸而在被洗腦之前，被綠川弘博士捨命救出，而決定化身幪面超人1號對打抗撒旦幫。

值得一提嘅係，東映特撮嘅官方YouTube上播方嘅「初代拉打」只限日本本土觀眾收看。如果身在香港各位要睇嘅話，就要去搵啲唔知咩V咩P咩N嘅方法啦。