Netflix劇集《Stranger Things》第四季嘅最後兩集將於7月1日上線，換言之距離整個系列就只差最後一季。而日前劇集主創杜夫兄弟 (The Duffer Brothers) 接受訪問，就提到小演員們大得太快，令佢哋要更改最後一季嘅時間線。

圖片：Netflix

《Stranger Things》四季以來，故事上只係經過咗四年 (1983-1986)，換言之原本大約係11、2歲嘅主角群，黎到第四季應該只係15、6歲嘅青少年。但由於演員們嘅年紀一開始就已經比角色要大，而且第一季至今，現實時間已經過咗6年，所以大部份「小演員」目前已經係18、9歲，從第四季中亦可以見到佢哋其實已經唔太似青少年——除咗飾演Dustin嘅Gaten Matarazoo III。

更重要嘅係，最後一季目前係未開拍，換言之演員們隨時又大一歲。所以The Duffer Brothers日前接受《TV Line》訪問時，就話：「我好肯定最後一季一定要黎個時間跳躍 (以配合演員們嘅年紀)。其實本來我哋就打算第四、第五季連住拍嘅，但就係冇可行嘅方法做到。」

圖片：Netflix

雖然The Duffer Brothers指出，佢哋對於《Stranger Things》最後一季「已經有計劃」，但佢哋都承認目前係未有開拍時間，甚至連劇本都未有最終定稿。「個結尾就係最難寫，好明顯地就係令人有壓力嘅，我哋好想佢可以完美落地」，「唔知你信唔信，但我哋仲搞緊第四季，我哋仲趕緊最後嗰兩集。好多嘢要搞架。」