|
相信大家只要有睇過《龍咁威》，應該都唔會對俗稱「拮拮降頭仔」嘅詛咒人偶感到陌生。而日本版嘅「拮拮降頭仔」就叫做「稻草人偶」，其用法同「拮拮降頭仔」可謂大同小異，不過就係用釘釘喺樹上面，而且通常都只係於影視作品中出現。但近日日本千葉縣松戶市嘅神社中，就先後出現多達10個稻草人偶，而且係用最狠嘅「釘心口」方法釘喺樹上，詛咒對象仲係俄羅斯總統普京添！ |
|
|
據日本傳媒報導，呢啲稻草人偶係由一名現年72歲嘅松戶市居民日野充信所製，同時亦係佢親手釘上神社嘅樹上。而據當地「三日月神社」嘅閉路電視畫面，可以見到日野充信進入神社前先環顧四週確定冇其他人，然後進行哂成個祈福儀式，然後再次確定四週冇人，再走出閉路電視畫面，去咗神社後面。而神社人員稍後時間就於神社後面嘅樹上搵到「稻草人偶」。 |
|
|
|
 |
|
|
更有趣嘅係，雖然用稻草人偶詛咒其他人，就算個詛咒對象係別國總統，喺日本都唔係一件犯法嘅事，但將個人偶釘上棵樹到呢個動作，就係「破壞公物」，而且三日月神社後方位置並不對外人開放，所以日野充信再犯埋「擅闖私人地方」。連警察上門拘捕日野充信時，佢本人都好奇：「因為咁咋？」似乎係代表佢以為自己會面臨更嚴重嘅罪名，換言之佢應該真係想咒死普京。 另一邊廂，日本網民就唔太認同日野充信嘅做法——唔係覺得佢唔應該詛咒普京，而係「幾廿歲人你仲搞呢啲嘢？」 |
|