Amber Heard接受NBC訪問已於上週末播出，當中大部份內容都係AH單方面訴說佢嘅故事版本。較為特別嘅係，AH向主持人Savannah Guthrie出示一份心理醫師報告，指係紀錄咗AH由2012年起被JD家暴嘅詳情。另外AH團隊亦向JD「挑機」，指如果佢哋有咩唔滿意，大可以自己黎接受訪問。

AH與其律師曾多次聲稱，今次佢哋會敗訴嘅原因，係因為有大量有力證據被禁止呈堂。而AH於訪問中就向主持人提供一個文件夾，並指入面嘅係「我醫生紀錄咗我向佢報告遭受家暴嘅紀錄，最早係由2011年，即係段關係一開始就有」。而NBC方面睇過份報告後，就話當中有紀錄到AH曾於2012年1月聲稱JD「打佢、推佢落地」、又於2013聲稱「佢推我埋牆並威脅要殺死我」。AH於訪問中指出，呢啲報告係佢遭受家暴嘅「實時紀錄」，另外佢仲有向自己父親提到遭家暴嘅短訊。

但以上資料，最終都被法官以「傳聞 (Hearsay)」為由而拒絕呈堂。

圖片：NBC

另一邊廂，於AH訪問出街之後，JD團體就發出聲明，指「不幸嘅係，當Johnny希望繼續生活時，被告及其團體就走去重覆、重塑、重審一件已經於庭上得到判決、陪審團一致裁定嘅事件」。而AH方亦立即出聲明反擊：「如果Depp先生及其團隊對於此有任何問題，我哋建議Johnny自己都坐低一個鐘同Savannah Guthrie做個訪問，答哂佢所有問題。」