隨住社會越黎越講求「包容 (Inclusive)」，大眾亦開始要面對一啲以往諗都冇諗過嘅問題。日前英國傳媒就報導，一名由18歲開始定期捐血，近50年來捐咗近60公斤血嘅66歲男子，因為拒絕回答捐血表格中「你目前或過去6個月內有否懷孕」嘅問題，而被拒捐血。佢指條問題「毫無意義」，整件事「令人憤怒」。

Leslie Sinclair

圖片：Daily Star

據《Daily Star》報導，該名66歲嘅蘇格蘭男子名叫Leslie Sinclair，已婚而且育有兩個小朋友。據佢向傳媒憶述，佢一直都非常樂意去捐血，亦從來唔覺得個捐血過程有任何問題，「佢哋係有張表格要你填，但通常都係關於你嘅身體狀況及病歷，咁好明顯係因為啲血要係安全嘅。但今次就有條我冇見過嘅問題：你現在或過去6個月期間曾否懷孕？要你答是或否。於是我去同啲職員講，對我 (作為一個男人) 而言，呢條問題係答唔到架喎，但佢哋就話我一定要答，唔係就唔可以捐血。」

電影《Junior》當中，Arnold Schwarzenegger就係飾演一個大肚嘅男人

圖片：《Junior》via IMDB

Leslie Sinclair指佢當時就同血站職權講，如果佢依家走咗，佢以後都唔會再黎捐血，但職員都冇讓步，所以最後佢冇捐到就返咗屋企。「條問題根本毫無意義，而令我憤怒嘅係真係有好多人等緊啲血，包括小朋友，但佢哋依家就冇辦法得到我嘅血，因為我答唔到一條根本冇得答嘅問題。」

而據當地捐血組織「蘇格蘭國立輸血服務」嘅主席Marc Turner回應，嗰條關於懷孕嘅問題的確只係針對「生物學上，或出身時係女性」嘅人，但就解釋「對職員黎講，有時唔係咁易分別」，同時強調係推廣「包容」係組織嘅責任，所有捐血者，不論男女都必須回答同一份表格嘅所有問題。

資料來源：Daily Star