四年一度嘅世界盃將於11月舉行，但打算去朝聖嘅球迷要注意喇，嚴守伊斯蘭教法嘅卡塔爾早前宣布，世界杯期間嚴禁婚外性行為、同性戀，以及喺公共場合飲酒，違者最高判監7年。至於點樣執法呢...我都想知。

據英媒《Daily Star》報導，雖然國際足協表示今屆世界盃「all are welcome」，但事實並非如此。一位警方消息人士透露，除非球迷以夫妻身份到訪卡塔爾，否則性行為係不被歡迎，更加唔使諗會有一夜情發生。當地同時對酒精飲品有所限制，禁止公共場合飲酒，球迷們唔想坐監就需要保持清醒，謹言慎行。另外亦有報導指，最近有唔同姓氏嘅球迷訂同一間酒店房被拒。

卡塔爾世界盃行政總裁Nasser Al-Khater表示：「我哋重視每位球迷嘅安全，但公開表達愛意嘅行為係不允許，呢樣唔係我哋嘅文化，適用於所以人。」而卡塔爾世界盃最高委員會亦發聲明強調：「卡塔爾係一個保守國家，無論性取向如何，公開表達愛意都係不允許。」當地政府甚至考慮禁止比賽觀眾席上出現「彩虹旗」。

資料來源：Daily Star