中國地大物博神奇的事每日發生，內地高考成為中國家長最關注的人生舞台。廣東省茂名化州市青島實驗學校一位考生全炫宇今年以694分成為該地區狀元成功考入北大，但原來呢位考生居然已經連續三年成功考入北大？翻查佢2020年就考入北大但就無入學，然後居然放棄學位再轉去湛江市北大附屬實驗學校再重考？第二年又成為狀元考入北大，之後又到化州市青島實驗學校再重考，再代表該學校成為狀元又考上北大，三年間單收學校獎學金就超過200萬，成為一位代表唔同學校出戰高考的職業考生？原來考高考居然有呢種玩法搵到錢？中國真係無奇不有！

大陸真古怪，唔同重點中學為左能夠出產高考狀元，居然可以出錢招收學霸，將考試能力強大的考生以獎學金方式招攬！根據《環球時報》報道，廣東省化州市青島實驗學校發布喜訊，稱該校學生全炫宇係今年的高考中，憑藉694（滿分750分）的高分斬獲茂名市高考狀元，考上北大。不過眼利的網民一睇就發覺有異常！明明上年又係考生全炫宇考入北大！網民開始質疑呢位狀元係「高考雇傭兵」專門為相應的學校出戰高考！甚更有人放料話此子過去3年3度考上北大，狀元獎勵金額累積達200萬元。「今年又被化州青島實驗學校以130萬買回來」。

當然被識破的全炫宇就有唔同故事，話說佢2019年畢業，一心想入清華經管專業，該專業要求全省前20，佢成績未達標，於是選擇再讀重考，第二年考試仍然排全省排名100名以後，錄取左北大醫學部，仍然無去。第三年又考上了北大。佢話佢都唔想！至於佢係咪賺取獎金係唔同學校重考出戰？針對外界質疑呢位學生多次高考為賺取獎學金、屬於「職業考生」等傳聞，化州市教育局紀檢監察室表示，有關部門已成立工作調查。廣東省教育考試院新聞發言人表示，經查核該考生符合招考政策，而廣東政策其實只要有廣東身分證就可以係廣東參加高考。

言下之意，其實呢位學生仲可以去第二個省入學再考！？中國內地對呢位考生職業性引發熱議，更神奇係唯有讀書高的氣氛下，居然有人認為佢作為職業考生係無問題！其中網民觀點係「別人是靠知識賺錢、憑成績賺錢，沒問題」、「知識就是力量」、「有實力就想選擇合適的專業，正常復讀沒問題」、「90%的高中老師都考不過他」。對呢位考生的行徑中國國內普遍認為無問題？相信佢日後仲可以出書同做名師教大家如何應考北大！