由尾田榮一郎老師創作嘅大熱漫畫《One Piece》至今已連載25年，而近日尾田老師就於《Jump》上發佈親筆公開信，再次提到《One Piece》已經進入完結篇，將會揭露整個世界嘅秘密。

圖片：Jump

卻說早前完成《和之國》篇嘅連載後，尾田老師於編輯部嘅建議下休刊四星期好好休息一下，而預計本月25號發行嘅2022年第34號就係連載重開嘅日子，為此尾田老師就寫咗封簡短嘅親筆信交代未來故事發展。

尾田老師於信中回憶，自已細細個就已經幻想可以畫出令人興奮嘅漫畫，然後指出《和之國篇》仲有少少收尾，然後 (最終篇嘅) 準備工作就會完成，「用咗我25年 (笑)」。尾田老師亦提到，就算依家先開始睇都冇問題，因為由依家開始先係「One Piece」嘅故事，接下來會將漫畫中一直隱藏嘅秘密全部揭露，而且一定會好有趣。佢仲叫大家綁好安全帶，做定心理準備添。

圖片：Jump

事實上尾田老師過去幾年已經多次強調《One Piece》快將完結。佢曾於2019年指出漫畫將於5年內完結，去年1月連載第1000話時又講過一次，然後單行本推出第100卷時又講多次。以2019年計嘅5年即係2024年內，換言之尾田老師仲有大概兩年半嘅時間去講述完結篇嘅故事，與《和之國篇》嘅連載時間相近。