以黑色幽默、暗黑、歌德美術風格聞名嘅Tim Burton，最近出席盧米埃電影節拎獎時分享對當今電影界睇法，更揚言唔會再同迪士尼合作，一切緣於2019年真人版《Dumbo（小飛象）》：「喺我職業生涯入面，曾被迪士尼多次聘請及解僱，《小飛象》呢套戲令我感覺係時候離開，我意識自己就係嗰隻「小飛象」，必須離開呢個糟糕嘅馬戲團(意指迪士尼)，唔再為佢哋工作，所以套戲某程度上係我嘅自傳。」不過Tim Burton就冇進一步解釋點解會對迪士尼改觀。

除此之外，Tim Burton亦分享對Marvel電影嘅睇法。佢認為Marvel電影非常同質化、一成不變，能夠探索唔同類型嘅空間好小，並覺得多元宇宙太複雜，佢只能夠處理到一個宇宙。言下之意，佢冇興趣涉足Marvel電影宇宙。

Tim Burton自1993年《The Nightmare Before Christmas（怪誕城之夜）》與迪士尼合作，歷年嚟共同創作過《James and the Giant Peach（飛天巨桃歷險記）》、真人版《Alice in Wonderland（愛麗絲夢遊仙境）》第1及2集、《Frankenweenie（怪誕復活狗）》以及真人版《Dumbo（小飛象）》多部電影。