橋本環奈自13歲參加偶像活動時被拍到「奇蹟的一張」後，就以「千年一遇美少女」之名爆紅，隨後展開演藝之路。10年後嘅今日，23歲嘅「環奈BB」唔單止係一線女星，亦大個到會開始拍拖。近日日本傳媒就拍到環奈BB抱狗進出24歲男星中川大志屋企，二人嘅緋聞亦瞬間成為日本熱話。

據《女性自身》報導，佢哋於10月中旬某日嘅晚上7點左右，拍到橋本環奈戴住帽同口罩，再抱住隻狗出現於「東京黃金地段的一棟低層豪華公寓」門前，隨後登上的士離去。據報橋本環奈於大約6點半左右到達該處，而當時係冇抱住隻狗，換言之佢係去嗰到接返隻狗，而現年24歲嘅男演員中川大志就住喺嗰棟「戶數非常少」嘅公寓之中。

幾日後嘅早上10點，《女性自身》又發現橋本環奈從同一棟公寓中步出，並乘咗公司車離開；大約一個鐘之後，中川大志亦出現於公寓門前，並乘坐的士離去。

據報環奈BB與中川大志可能早於2014年就認識。當時中川大志出演《水球不良少年》，而環奈BB就在劇集客串飾演自己。而近日二人就一同主演漫改電影《黑夜遊行》而相熟，加上二人都非常鍾意狗同非常鍾意飲酒，所以發展成親密關係。不過值得一提嘅係，《女性自身》曾經分別向二人嘅經理人公司求證，不過雙方公司都冇回應。所以暫時一切都只係「傳聞」啫。

資料來源：女性自身