又到年尾，亦即係日本各大百貨公司推出福袋嘅時節。而日本著名百貨高島屋今年就推出一個超誇張嘅福袋——一間價值330萬Yen，即約18萬港紙嘅屋，而且仲送家俬！

日本高島屋日前宣佈，將與日本建築設計公司Serendix推出超強福袋抽獎，得獎者可以獲得Serendix送出嘅3D打印屋「Sphere」一間。「Sphere」嘅賣點係利用3D打印技術，將鋼筋混凝土一層層、一圈圈地堆疊，最快只需24小時就可以起好建築物嘅外牆，一次過解決建築工人不足、住宅不足、以及建築廢料等多個問題。

建成後嘅「Sphere」佔地面積大概為10平方米、高約3.9米，整體呈球狀以增加防震能力。Sphere本身就只係一個「殼」，入面係咩都冇，但高島屋就話會為得獎者提供「自選家居」，即係送埋家俬。福袋抽獎由明年1月2日起，於日本共15間高島屋店鋪接受報名，名額一名。

不過高島屋講到明，你要自己搵塊地黎放間屋，而且地面整平等前期工程要另外畀錢，間屋仲要唔可以拉水喉 (可以拉電)，換言之佢係冇辦法作為正常住宅咁居住，只能作為別墅或特別用途小屋。但福袋送間屋喎！況且我諗佢再唔好住，應該都好過啲咩「簡約公屋」掛？至少個樣靚啲先啦？