第10位：錯誤地使用縮寫

為咗打字方便，好多時我哋都會用縮寫黎Sd Msg，例如我啱先呢個「Sd Msg」其實係「Send Message」、「Cwb」其實就即係銅鑼灣、「DLLM」就即係Diu……呃…咳。而問題唔係在於你用唔用，而係有冇用錯，例如依家個個都識嘅「LOL」其實係「Laugh Out Loud」嘅縮寫，但好多人見到中間有個「O」就當「O咀」用，結果人家同你講佢老母過咗身，你就「LOL」，咁幾肉酸呢？

第9位：相機食先

同啲港女(仲有好多港男)食飯，佢哋硬係要相機食先，結果啲嘢食擺到凍哂唔在講，最邪惡係佢哋深夜時份放返啲嘢食相出黎，結果你臨瞓前見到就即刻餓到瞓唔著，要起身煮個麵先搞得掂，呢啲咪累人累物囉！

第8位：自拍

唔好以為你喺FB、Instagram見到啲人自拍已經好嘔心，你有冇試過喺地鐵見到條友大庭廣眾、眾目睽睽之下公然扮Cute自拍？睇到，係你想自殺！

第7位：手機塔利班

即係嗰啲何時何地都要證明自己部電話有幾勁有幾巴閉有幾識飛嗰啲煩膠呢……冇！我邊有話係「果粉」啫，我冇呀！我冇講過架！

第6位：邊走邊Text

求其行出街都見到架，唔知你以為佢係夜魔俠，用聲納感應四週物件架！最頂氣嘅係佢個聲納成日失靈然後一嘢撞入你懷中嘛，仲次次都係麻甩佬黎添！你問我點解唔避開佢？因為我都玩緊電話囉！

第5位：遊戲邀請

老老實實，我真係唔想喺FB養魚、種田、玩Poker，更加唔明點解你仲有心情玩Candy Crush，但你玩你事，你唔好成日邀請我呀！我玩人生呢個遊戲已經好Q忙，我冇你咁得閒架！

你又問，點解我唔Unfriend佢？因為邀請我嗰個係我老母呀嘛！

第4位：網絡用語

濫用網絡用語嘅問題係其他人未必睇得明，例如之前咪有個笑話係個阿媽以為「WTF」係解「Welcome to facebook」嘅？至於香港版嘅就有港女專用「廣東話併音」嘞！但最令我討厭嘅係有個男仔朋友會將一句中文句子夾硬縮短佢，即係例如你問佢目前位置，佢會答你「啱出」，話解「啱啱出門口」喎！咁「中出」係咩呀！？「中華人民共和國選出嘅香港特首」咁呀？你玩哂啦？

第3位：唔用耳筒聽歌

每朝喺巴士地鐵都會遇到嘅，唔知佢係覺得自己有責任宣揚音樂，定係買得起幾千蚊一部電話買唔起幾十蚊一個耳筒，反正佢哋就係鍾意義務擔任廣播大士。老老實實我已經要面對胡楓個「巴士仔提提你」架啦，你再加啲不知名「咚吱咚吱」我真係頂唔順呢！

第2位：出黎食飯玩電話

其實你出得黎食飯，唔該你就同人傾下計；你係唔想講嘢，就不如自己一個食。你話成枱人坐埋圍住玩電話有咩謂？唔知以為你哋講緊秘密唔畀得隔離枱知添！不過文青又唔會怪你嘅－－畢竟你好可能就係食緊飯嘅時候睇我呢篇嘢架嘛係咪？

第1位：公共交通工具上大聲講電話

由於文青鬧到好攰，加上我認為當年謝安琪嘅《私隱線》對呢件事已經講得好清楚，所以大家不如聽歌算啦。