作為一個合格嘅文藝青年，如果有喺你面前提起「村上春樹」，你應該立即舉手搶答：「我知我知！《挪威的森林》同『高牆與雞蛋之間我永遠都站在雞蛋一方』嘛！」

得啦得啦，叻啦叻啦。但你又知唔知道村上春同佢老婆嘅相處之道？話說由1月開始，村上春樹就喺自己個Blog到接受讀者提問，當中由人生哲學到解決核問題再到沉迷電視都有涵蓋，近日仲結集成書添！之但係有Fans細心整理過村上春樹關於夫妻相處之道嘅回答，就發現有啲唔妥……

問：「你太太會經常發你脾氣嗎？」

答：「Well，又唔係好～經常嘅。當我哋之間有爭執，我係嗰種會儘量避開風暴嘅人，而佢就係召喚出風暴嘅人。我成日都覺得自己好似一棵楊柳，喺暴風雨、雪吹襲之下躬身避難。過去44年我都係咁生活嘅，睇黎我喺後園棵楊柳身上學咗唔少嘢。」

係呢？唔妥呢？係咪好奇怪呢個喺文壇上吒咤風雲嘅男人，究竟因咩事搞成咁呢？繼續睇落去你就知啦。

攝於1994年劍橋，長髮女子為村上春樹太太－村上陽子。

問：「鬧完交，有咩絕技氹返老婆？」

答：「明顯地，你需要致以最真誠嘅道歉。因為根本就冇啲咩所謂絕技。你係一個大人，就要有大人應有嘅行為，所以就要低頭道歉，就係咁簡單。冇電視直播你認衰仔已經好好架啦！

又或者換個角度諗：如果有架火車向你撞埋黎，你唔會諗住企定定鬧走佢架？同老婆鬧交係同一道理，唔好浪費氣力，儘快走去安全嘅地方好過。」

問：「老婆唔開心，我應該點做好？」

答：「如果老婆唔開心，佢好有可能會遷怒於你，然後你就會覺得自己好無辜。相信世界上92%嘅老公都會有同感。

計我話你可以將佢嘅憤怒當成係龍捲風呀、颱風呀之類嘅天然災害。咁樣你自己會好過一啲。因為如果你將佢當成係一個人，好有可能連自己都會唔開心埋一份；但如果當成係『不可抗力』，你就會好容易心平氣和咁等佢自然消散。希望咁樣幫到你，記住要久唔久微笑同點頭呀！」

即係究竟要幾愛火車同天災，又或者幾唔愛你老婆，先會拎佢哋黎比較呢……

問：「維繫婚姻嘅方法係咩？」

答：「妥協。而最重要嘅係就算你嘅另一半唔妥協，你都一定要妥協。如果你做到呢樣嘢，你嘅婚姻就可以好長久。」

問：「《挪》入面嘅小林綠，係咪以你太太為藍本而設計。」

答：「我將你呢個問題比咗我老婆睇，佢依家好嬲而且大叫『點解佢哋會覺得小林綠係以我為藍本！？』。佢叫我拆掂佢，所以我就打咗呢堆字黎回覆你。請你唔好再為我嘅家庭帶黎危機啦好嗎？」