以「動物不是供我們食用、穿戴、實驗、娛樂或以任何方式虐待的」為口號嘅「善待動物組織 (PETA)」，過往曾多次針對電玩遊戲中玩家如何對待動物/怪物而發聲。而網民近日發現，原來佢哋都有為《Hogwarts Legacy》發佈「友好指引」，提倡「不要騎鷹馬」等「保護動物措施」，令網民笑稱PETA「雖然遲到但總是會到」。

圖片：《Hogwarts Legacy》

PETA於2月8日，即係《Hogwarts Legacy》遊戲正式發佈之前，就已經官網上發表一篇名為「如何對幻想動物友好地遊玩《Hogwarts Legacy》」嘅文章。文章一開首就話會提供三個貼士，令大家能以動物友好嘅方式體驗魔法世界，更揚言「即使係由像素組成嘅魔法生物都值得大家尊重」。

而三個貼士分別係「不要騎鷹馬或騎士墜鬼馬，一定要騎掃帚」、「避免使用含有動物原材料的魔藥」以及「挑選植物原材料的裝備」。

圖片：《Hogwarts Legacy》

縱然對一般人而言，PETA提出嘅三點貼士都頗為荒謬。但不得不讚嘅係，佢哋呢份貼士寫得非常有心思。例如叫大家「不要騎鷹馬」一段，佢哋就順手提埋大家「於麻瓜生活中亦要避免騎馬、大象或驢」；關於魔藥嘅一段就寫道：「只要你翻滾迴避做得夠好，根本就唔需要飲藥。況且一個完美時機嘅破心護 (遊戲中嘅防禦) 更能展現你的技術。」可見佢哋的確有玩過下隻遊戲先提出貼士。況且，佢哋冇叫你唔好打蜘蛛，都唔算太離地呀。

資料來源：PETA