日本女神深田恭子自2021年中起，就因為「適應障礙症」以及連帶嘅酗酒問題而停工休息，直到2月先以日本Amazon Prime劇集《A2Z》而復出。而除咗復出嘅好消息外，日本雜誌《News Post Seven》今日就報導，深田恭子多得男友帶挈，身家即將暴漲幾十億Yen，更有可能成為日本演藝圈少有嘅「上市公司大股東」。

據《News Post Seven》報導，深田恭子自2018年與現年45歲嘅企業家杉本宏之交往。而杉本宏之由廿令歲開始就已經投身於日本房地產市場，後來因為雷曼兄弟事件而一度破產，但又東山再起成立以「集資買樓服務」而聞名嘅「SYLA Technologies」，杉本宏之更一度揚言，喺公司收入破1000億之前，唔會再掂自己熱愛嘅電單車同高爾夫球。而「SYLA」近年火速發展，2021財政年嘅收入比起2020年急升120%達166億Yen，公司亦已申請於美國上市，而女友深田恭子就透過資產管理公司持有大量SYLA股份。雖然目前無公佈深田恭子持股數量，但保守估計都有一億股以上，亦即係話只要SYLA於4月成功上市，深田恭子嘅身家就會暴漲幾十億Yen。

杉本宏之

但你又唔好以為杉本宏之之所以溝到女神，係單單因為佢有錢。據知情人士指出，二人最早於2018年因為朋友飯局而認識，2019年初正式交往。本身熱愛紅酒嘅杉本宏之曾向深田恭子送上出身年份嘅勃艮第紅酒，而深田恭子就以寫真集還禮。但因為當時二人都分別忙於事業，其實冇咩時間相處。

後來深田恭子因病停工在家休養，杉本宏之就化身廿四孝男友陪伴及照顧。點知休養半年身體變好後，深田恭子又開始酗酒，經常出外飲通宵，直到中午先返屋企，更有人曾經聽到杉本宏之當街當巷鬧深田恭子「你夠啦！」但返到屋企深田恭子都係繼續開酒飲。事後二人決定稍為分開冷靜。

但杉本宏之並無放棄深田恭子。據知情人士指，雖然深田恭子戀愛經驗非常豐富，但杉本宏之對佢黎講係一個特別存在，杉本宏之非常可靠，同時亦深愛深田恭子，即使因為公司上市一事非常忙碌，但仍然會抽時間與深田恭子見面，所以二人最終又喺返埋一齊。據指雖然二人未有結婚打算，但目前係互相抱持適當距離感下安定地交往。

資料來源：News Post Seven