每個人心中都有一部日本少年漫畫神作，而一部作品「神唔神」，好大程度都係睇佢個尾完得好唔好。近日日本網站「Goo Ranking」就舉辦咗個「結局最高少年漫畫」網民票選，唔少大家心中嘅神作都有上榜！

圖片：Ranking.goo

Goo Ranking搵黎過千位網民選出佢哋覺得「結局最高嘅少年漫畫」，結果有55部作品上榜 (至少獲得一票)，而頭20名更加係「名作滿天飛」，其中包括 (由20名數起) 《達爾大冒險》、《死亡筆記》、《山T女福星》、《四月是你的謊言》、《龍珠》、《H2》、《進擊的巨人》、《北斗之拳》、《NARUTO》以及《幽遊白書》。其後嘅第9名由《遊戲王》及《銀魂》共同奪得，第8位係安達充嘅《Rough》、第7係古館春一嘅《排球少年》、第6係高森朝雄嘅《鐵拳浪子》，第4名由松井優征嘅《暗殺教室》以及吾峠呼世晴嘅《鬼滅之刃》瓜分。相信大家只要見到以上作品個名，都已經記得返佢個結局係點。

圖片：Ranking.goo

至於頭三名中，唔少人嘅心水之選《Slam Dunk》只排第3，荒川弘嘅公認神作《鋼之鍊金術師》排第二，而第一嘅就係安達充嘅《Touch》。值得一提嘅係，安達充老師於前20名中獨佔三位 (《H2》、《Rough》及《Touch》)，可見其作品水準之高。另外排第3嘅《Slam Dunk》以及排第10嘅《幽遊白書》，其「戛然而止」嘅結局當年曾經惹來唔少爭議，但似乎隨年月過去，大家都接受咗呢種有「遺憾」嘅結局。唔知各位又點睇呢個排行榜？

資料來源：Ranking.goo