韓國院線「MEGABOX (메가박스)」自2019年7月嘅《Spider-Man: Far From Home》起，就開始為上映嘅電影設計精美嘅特別戲飛，有時同一套戲仲有唔同版本。例如早前嘅《John Wick 4》，就分別有電影標誌、Keanu Reeves大頭以及手槍三種不同設計；而講述球鞋品牌Jordan Air故事嘅《Air》，其中一個版本就係模仿鞋盒質地，印有場次資料嘅一面就加上車線及皮質紋理；而為配合日本動畫《鈴芽之旅》嘅主題，電影嘅戲飛真係可以好似度門咁打開；《鐵達尼號》重映版嘅戲飛設計相對簡單，但就送多張「鐵達尼號」船飛。不過眾多戲飛中最特別嘅，就可能係2021年韓國電影《獵魂者》嘅戲飛，因為佢用上感溫塗料，遇熱先會從一片黑色中顯示真正嘅圖案。
韓國MEGABOX嘅唔單止深受韓國國內嘅影迷及收藏者歡迎，早前被網民上傳到Twitter後更成為國際熱話，唔少外國影迷都想儲埋一份。而精美嘅戲飛亦唔僅限於製造話題，例如據韓國媒體報導，早前MEGABOX為重映嘅《La La Land》設計新戲飛，結果因為啲Fans想要張戲飛爭相搶購，令《La La Land》成為票房冠軍。唔知香港嘅院線又會唔會仿傚一下，重新吸引大家入場呢？
