卻說一年前，數名前紐約唐人街黑幫大佬於YouTube上開設《Chinatown Gang Stories》，親身講述當年嘅黑幫故事。而其中一位主持綽號「大頭」的徐仕煌(Jimmy Tsui)，更曾「回流」香港加入「新X安」幫會。而日前佢就接受美國媒體《Insider》訪問，大爆當年嘅香港黑幫故事。
據大頭稱，佢成長於香港油麻地廟街附近，年少時父親見環境複雜，個仔有學壞嘅可能，於是舉家搬去美國紐約，點知最終大頭都係因緣際會加入紐約唐人街幫會。後來因為於美國惹上官非，加上當時唐人街黑幫大都於香港黑幫有關係，所以佢就「回流」香港加入「新X安」，於1988年成為幫中「426 (雙花紅棍)」。後來因為被仇家於美國停車場連開5槍而選擇金盤洗手。
大頭於訪問中，除咗頗為巨細無遺地憶述當年回港後嘅入會過程 (包括「堂口詩」、以往幫會不同地位人士專屬嘅手勢之外。仲談到幫會嘅收入來源。其中佢就指出，當年幫會「完全掌管電影業」，如果演員們「唔聽話」，唔單止可能冇角色做，更會「被處罰」；佢亦提到某位電影明星曾經公開講「我唔係黑社會」，「你信咩？你信就信囉，我就唔信啦」，「好多出名嘅女明星，佢哋都係幫會中人，其他人唔知，但我哋知。」
另外於訪問中，佢亦提到幫會中嘅架構，幫會大佬之間、不同幫會之間嘅生態及規則。如果大家有興趣的話可以去睇足本版。值得一提嘅係，大頭於訪問最後亦向年輕人呼籲，唔好相信父母以外嘅任何人、唔好相信任何黑幫電影，加入幫會唔會令大家成為英雄，而係只會有兩種結果，一係就坐監，一係就死。
另外佢於《Chinatown Gang Stories》中亦有提到早年幫會入侵香港娛樂圈時嘅所見所聞，大家亦可以睇下。
