曾獲全英音樂獎（Brit Awards）最佳女歌手嘅Paloma Faith，日前帶完兩個女去睇《小魚仙》後一肚火，忍唔住喺Instagram爆粗批評劇中情節教壞細路：「剛剛同我啲小朋友睇完新版小魚仙，雖然Halle Bailey演得出色而且選角好好，但作為一位媽媽，我唔希望我啲小朋友認為，為咗得到一個男人嘅愛情，而放棄自己把靚聲同力量呢種行為係OK嘅。呢啲係乜*嘢？我絕對唔會想咁樣教育下一代女性。」

Paloma Faith隨即被迪士尼Fans圍插，指佢係咪未睇過原版動畫，真人版電影只係跟返原著故事，亦有人指出小魚仙唔係為咗男人放棄把靚聲，而係希望成為人類。有趣嘅係，有網民就摷到Paloma Faith早喺2009年曾於Twitter上講過「我長大後想成為小魚仙」，嚟諷刺佢嘅思想轉變。

when i grow up i want to be the little mermaid

— Paloma Faith???? (@Palomafaith) October 30, 2009

順帶一提，查實迪士尼唔少經典動畫都被明星名人批評過「不合時宣」，例如《加勒比海盜》女主角Keira Knightley早些年就曾經喺名嘴Ellen DeGeneres節目上表示，佢唔會畀佢個女睇《小魚仙》同《灰姑娘》，原因同樣係唔想個女學埋啲「等一個有錢王子嚟救自己」、「為男人放棄自己把靚聲」嘅思想，要做就要成為有權力嘅女王，而唔係公主。相反《魔雪奇緣》、《魔海奇緣》以及《海底奇兵》就係「可以睇」嘅動畫。