Twitch過往一直係直播界嘅龍頭大哥，就算Google旗下嘅YouTube早年努力開拓直播服務，依然未能撼動其地位。不過隨住近年Twitch與直播主之間嘅分成爭議、以及一系列管理問題，唔少直播主對於Twitch越見不滿。最近於Twitch上座擁1170萬追蹤者嘅「xQc」決定出走新直播平台「KICK」，隨後就連「浴缸直播」嘅始祖、擁有640萬追蹤嘅「AMOURANTH」亦宣佈轉會。

IT'S TIME pic.twitter.com/jHRWkn5WEP

— xQc (@xQc) June 16, 2023

xQc (圖右)

圖片 @xqcow1

卻說「xQc」於上週六時宣佈與「KICK」簽下一份價值一億美元嘅兩年合約，未來將會「轉會」到KICK上直播。不過據知新合約有別於直播界嘅過往慣例，為「非獨家合約」，換言之「xQc」未來仍可於YouTube、Twitch等其他直播平台出現。另外據知合約中嘅一億美元中，有約30%為激勵獎金，達到某個目標後先會兌現。但即使不達標，「xQc」仍可獲得近7000萬美金嘅「底薪」。

同時，「xQc」日前接受另一Twitch知名直播主「Pokimane」訪問時，亦透露自己收到KICK提供嘅股權，但佢就強調自己係真心鍾意新平台先轉會。

IT’S TIME pic.twitter.com/HyKlZrggRr

— Amouranth (@Amouranth) June 17, 2023

AMOURANTH

圖片 @amouranthoffical

而喺「xQc」宣佈轉會嘅一日後，性感直播主「AMOURANTH」亦於Twitter宣佈自己將會轉會至KICK。上週日時佢於Twitter發佈一條戲劇短片，指佢見到「xQc」收到天價轉會後打畀經理人，問自己可唔可以都「要一份咁嘅合約」，然後就搬咗一堆綠色嘅出嘢，疑似準備搬屋 (KICK主色為綠色)，影片最後出現KICK嘅標誌，以及佢嘅直播頁連結。

「AMOURANTH」於去年被選為Twitch嘅年度女性直播主，亦係Twitch上擁有第21多追蹤數嘅直播主。佢早年經常以性感造型直播，甚至會身穿性感泳衣於浴缸中進行直播，吸引其他女性直播主爭相仿傚，直接開創所謂嘅「浴缸直播」。不過去年年尾佢就指自己長期遭亞裔老公家暴，浴缸直播亦係對方嘅主意，最後二人離婚，而近來「AMOURANTH」亦的確較為著重傳統嘅打機直播，衣著亦稍為收斂——不過佢個YouTube就依然以試著泳衣為主題。