為免強化原版動畫刻板印象，迪士尼真人版《雪姑七友》邀請到不同種族、膚色、性別演員重新演繹七位「小矮人」，貫徹荷里活近年嘅多元選角精神。

據外媒《Daily Mail》報導，迪士尼真人版《雪姑七友》目前正在英國拍攝，從片場照可見，七位小矮人造型與原版動畫大為不同，由不同種族、膚色、身高演員出演，甚至出現女性（或其他性別）演員。另外，迪士尼亦將小矮人改稱為「魔法生物（magical creatures）」，以避免強化刻板印象，促進多元文化及包容性。照片隨即引起熱烈討論，新穎嘅角色設定令唔少網民不禁直呼「毀童年」。

對此，迪士尼最初表示係上述照片為「假相」，但後來又改口話照片確實取自片場，不過唔係官方照片，並澄清相中嘅嘅紅頭巾女士係Rachel Zegler（白雪公主）嘅替身演員。

《Game of Thrones（權力的遊戲 ）》男星Peter Dinklage早前就爆粗批評過《雪姑七友》故事非常落後/不合時宜（backward），指責迪士尼一方面為搵嚟拉丁裔女星出演白雪公主感到自豪，另一方面又要拍攝七個小矮人呢種刻板過時嘅故仔。當時迪士尼就承諾7位角色將以截然不同嘅方式呈現，睇嚟佢哋確實講得出又做得到。

除此之外，為貼近新時代價值觀，真人版《雪姑七友》唔會有白馬王子拯救公主嘅情節，而係講述白雪成為一個領導者追尋夢想，預計明年3月正式上映。