由荷里活編劇工會 (WGA) 發起嘅罷工已持續近兩個半月，上月中就連演員工會 (SAG-AFTRA)亦開始加入，唔少知名演員如Mark Ruffalo、《Better Call Saul》嘅主演Bob Odenkirk等亦曾親自拎起標語走上街頭。但近日有人質疑一眾一線演員對罷工不聞不問，從未見過佢哋參與相關遊行，隨後《New York Times》就報導指，其實多位一線演員都有對罷工作出更實際嘅支持：捐錢。而且仲非常大手筆。

圖片：wikicommon

卻說《Variety》記者Matt Donnelly上週發表一篇名為《為甚麼看不到一線演員加入遊行？》的文章，指雖然如「梅姨」Meryl Streep、Jennifer Lawrence、Rami Malek等人曾於罷工公告中署名、Leonardo DiCaprio曾於IG發文表態支持工會，但佢哋都未曾親身參與遊行，更惶論一大堆從未公開發聲支持嘅一線演員。部份參與遊行人士甚至遷怒於一線演員，曾有人舉出寫住「Ben Affleck去咗邊L到？」嘅標語，質疑一線演員缺席令遊行嘅曝光率不足，難以引起大眾關注。

但其實《Variety》嘅文章中亦提到，演員工會本身都唔太希望一線演員參與遊行。原因係罷工議題之一就係為演員爭取合理薪酬，一眾明顯唔缺錢嘅一線演員參與，好容易會造成「明明好有錢仲想賺多啲」嘅錯誤觀念，反而模糊大眾焦點。有業內人士表示，如果一線演員們真係想幫手，最好嘅方法其實係向會定期補助低收入演員嘅工會基金捐款。例如Dwayne Johnson上週初就向基金捐出「7位數字」，令基金能夠繼續支持因罷工而失去微薄收入嘅普通演員。

事實上Dwayne Johnson亦唔係唯一一個向基金捐錢嘅一線演員。近日《New York Times》引述演員工會基金嘅公告，指「梅姨」及George Clooney夫婦早於罷工開始時，就分別向基金捐咗100萬美金，隨後更積極遊說其他一線演員捐款，目前Leonardo DiCaprio、Nicole Kidman、Julia Roberts、Arnold Schwarzenegger、Oprah Winfrey，以及上文提到嘅Dwayne Johnson都以個人名義各捐咗100萬，而Jennifer Lopez及Ben Affleck、Ryan Reynolds及Blake Lively，以及Matt Damon、Hugh Jackman等就以夫婦名義捐款，各人合共捐出1500萬美金，即約1.2億港元。

演員工會主席Fran Drescher曾表示，工會超過16萬名會員中，有86%年收入不足2.6萬美金。而自從罷工開始後，工會收到嘅補助申請係往常嘅30倍，單單上週就收到400份申請。所以一線演員們嘅捐款，對一眾收入受影響、爭取緊合理薪酬嘅普通演員黎講其實相當重要。

資料來源：Variety、New York Times