日本票選網站「The Qoo」久唔久就會舉行關於日本女藝人嘅票選，而過往無論係「女性最想擁有嘅面孔」、「男性覺得最GF-able」等票選，橋本環奈及有村架純都一定坐亞望冠。不過近日The Qoo舉行嘅「男性最想娶嘅單身女星」中，佢哋就只能屈居第二及第三，至於第一名，就由一位女神級女藝人奪得。

本田翼

深田恭子

石田ゆり子

浜辺美波

今田美桜

長澤正美

広瀬鈴

顧名思義，呢個票選就係由男網民一人一票選出佢哋最想娶返屋企嘅單身女藝人。咁大家都知男人嘅審美觀其實好簡單直接，所以頭十名中都係大家熟口熟面、之前多次於其他類似排行榜上登場嘅女藝人。由第十名到第四名分別為「本田翼」、「深田恭子」、「石田ゆり子」、「浜辺美波」、「今田美桜」、「長澤正美」以及「広瀬鈴」。

其中較為少見嘅應該係第8位嘅「石田ゆり子」，現年53歲嘅佢亦係頭十名中年紀最大嘅一位。「石田ゆり子」為一名演員兼作家，小時候曾在台灣短暫居住，所以識講中文。高一時被星探發掘並成為全日空嘅形象女郎，後來成為演員時亦以柔弱溫婉嘅角色為主。過去曾多次登上「最想佢係我媽媽」、「最強童顏」、「靚到如奇蹟一樣嘅50代女演員」等排行榜。

橋本環奈

有村架純

綾瀨遙

回到「最想娶回家嘅單身女星」排行。正如前文所說，第三名就係無論演技、身材、外貌都無咩好挑剔嘅「有村架純」，考慮到佢過去曾多次登上「最佳女友」、「最性感20代女星」、「最美20代女星」等多個排行嘅頭十，今次只能排第三都已經算係「小跌眼鏡」。至於第二名環奈BB就大家就更加熟悉，即使早前傳出拍拖、上男友屋企過夜嘅消息依然人氣不減，亦反映出佢嘅形象已由當年嘅「國民妹妹」變成亭亭玉立嘅美女。

至於第一名，就係現年38歲嘅「綾瀨遙」。無論係演技定歌唱實力都備受認可嘅「遙妹」，多年黎嘅身材外貌亦維持喺頂級水準。邊個娶到佢返屋企都一定係男性公敵。今次能夠登上榜首亦在意料之中。

資料來源：The Qoo