一年一度嘅《Pokemon世錦賽》已於過去嘅週末，於日本橫濱順利完成，而各項比賽嘅冠軍人選亦已出爐。其中，來自台灣嘅11歲選手「顏紹同」，成功奪得卡牌遊戲少年組嘅冠軍，更係台灣首位卡牌組冠軍。而香港亦有選手打入卡牌遊戲大師組八強。

卡牌遊戲各組冠亞軍。右三為顏紹同

今屆台灣總共有11名選手參與卡牌遊戲 (TCG) 比賽，其中11歲嘅顏紹同出戰12歲或以下嘅少年組，先透過積分循環制比賽，於全球排名前93名嘅選手中脫穎而出晉身八強，並先後於八強及四強擊敗兩位日本選手，對上來自巴西嘅Gabriel Dorges Torres。決賽中顏紹同以「放逐系統+蓋歐卡」卡組，直落兩盤擊敗使用「阿爾宙斯+鋁鋼龍」卡組嘅Gabriel成功奪冠。

2019年時，當時10歲嘅台灣少年吳比亦曾成為電玩遊戲 (VGC) 少年組嘅冠軍，亦係台灣首個Pokemon世錦賽冠軍。而顏紹同則成為台灣首位卡牌比賽冠軍。

顏紹同勝出一刻

而香港其實亦有選手參與盛事。其中七位參加卡牌比賽，一位參與電玩遊戲組比賽。而翻查資料，參加卡牌比賽嘅大師組嘅選手「Pang Kai Hing」於首日積分循環賽中獲得5勝3和0負好成績得以晉身八強，可惜於八強輸咗畀最後奪冠嘅美國選手Vance Kelley。

資料來源：worlds.pokemon.com