繼2003年《無間道》後，梁朝偉及劉德華兩大影帝再度合演懸疑劇情犯罪片《金手指》，定檔今年12月30日正式上映！

《金手指》由英皇電影耗資3.5億港元製作，金像導演兼編劇莊文強編導，劉德華、梁朝偉、蔡卓妍(阿Sa)、任達華、方中信主演，故事改編自80年代轟動一時嘅貪污案件「佳寧案」，講述一間上市公司短短幾年間從崛起到清盤，最後更被廉政公署橫跨八個國家追查長達15年。劉德華將於劇中扮演廉政公署調查員「劉啟源」，而梁朝偉則會飾演幕後老闆「程一言」（角色原型為陳松青），預計兩大影帝將會上演精彩嘅鬥智戲碼。

短短一分多鐘嘅預告，劈頭第一句說話「其實喺香港做生意真係幾好玩！」已經令觀眾感受到程一言嘅野心及高傲，鏡頭一轉，廉署調查員劉啟源就帶住大批人馬質問「呼風喚雨喎，你就緊係好玩啦。啲錢喺邊度嚟？」一段由100元起步賺100億嘅故事由此展開。預定12月30日於香港、澳門、台灣、新加坡、新加坡、馬來西亞、澳州、新西蘭、英國、美國、加拿大等國家及地區同步上映。

值得一提嘅係，除咗幾位影帝級人馬，白只、胡子彤、岑珈其、何啟華(Dee哥)、徐浩昌(肥腸)等新一代演員亦有份參演，一齊嚟期待佢哋嘅演出啦！