雖然遊戲業界發展一日千里，但有唔少機迷、特別係歐美地區嘅機迷都對懷舊遊戲及主機情有獨鍾，令懷舊遊戲卡帶及主機到今日都仲有價有市。咁既然有需求就自然有供應。例如著名開發商Atari早年就曾經推出過以旗下經典主機「Atari 2600」為靈感嘅「Atari VSC」，近日更宣佈會推出「Atari 2600」嘅新型號「Atari 2600+」。

2018年推出嘅「Atari VSC」，其實就係一部個樣有啲似「Atari 2600」、內置遊戲、配備現代輸入輸出端子嘅「遊戲盒子」，係就係幾方便而且幾有型，但對於一眾「懷舊Game迷」黎講就可能唔夠「原汁原味」。而即將推出嘅「Atari 2600+」，除咗個樣同當年嘅「Atari 2600」一模一樣之外 (但體積細咗20%)，更重要嘅係配有遊戲卡帶插口，而且支援「Atari 2600」以及後繼機「Atari 7800」嘅遊戲卡帶，令增加遊玩體驗更加完整。

另外「Atari 2600+」亦設有HDMI輸出以及USB-C插口，方便現代玩家接駁其他裝置；但同時部機又有兩個串列埠 (Serial Port)，用黎支援返「Atari 2600」嘅原裝控制器。跟機亦會附送一餅「10合一」遊戲卡帶，以及一個同樣參考原版「CX40」嘅「CX40+」操縱桿。

「Atari 2600+」將會於11月17日正式發售，售價為129.99美金，即約HK$1,000左右。可惜嘅係Atari官網只限美國本土玩家購買，如果身在香港嘅各位想買，就要另尋辦法啦。

資料來源：Atari