日前墨西哥國會眾議院舉行「不明飛行現象 (UAP，前稱UFO)」聽證會，而當地記者兼外星專家Jaime Maussan就向國會出示兩尊佢聲稱係「外星人遺骸」嘅石化屍體，並於宣誓下堅稱遺骸有至少過千年歷史，「是人類歷史的分水嶺」。

圖片：Daily Mail

Jaime Maussan日前向墨西哥國會出示兩具被安放於玻璃箱內嘅「外星人遺骸」，遺骸大約為人類小朋友大小，面部呈圓筒形向前突出，而且有清晰嘅眼、鼻、口，軀幹及四肢修長而纖細，手上只有三根手指，其中一具入面仲有「卵狀物」。遺骸表面亦被類似沙泥嘅物質所覆蓋。

Jaime Maussan於國會中宣誓表示，遺骸係於秘魯城市「Cusco」嘅一個矽藻礦場中被發現，而經放射性定年法推算大約有1000年歷史。同時佢亦指，墨西哥國立自治大學化驗遺骸後，認為「遺骸不屬於地球行星進化史」，而且「有30%來源不明的基因」。Jaime Maussan指出：「我哋唔知佢係咪真係外星人，但佢哋有智慧而且曾經於人類生存於同一時期，歷史應該被改寫。」

圖片：Daily Mail

但聽證會後有唔少人對於Jaime Maussan嘅「發現」提出疑問。例如有外國媒體指呢兩具「外星人遺骸」與大眾想像中嘅外星人「驚人地相似」；而墨西哥國立自治大學嘅物理學家Julieta Fierro亦於聽證會後一日公開表示，大學從未支持Jaime Maussan嘅說法，亦質疑其數據「完全不合理」。

資料來源：Daily Mail