早排同大家報導過《Magic The Gathering》(MTG, 魔法風雲會) 與《The Lord of Rings》推出聯乘卡組，當中全球限定一張嘅「至尊魔戒」未出就炒到200萬美金，最終由歌手Post Malone成功買下，相信大家都知《MTG》卡有幾炒得。而《MTG》官方近日就宣佈會同全球知名嘅Marvel合作推出聯乘卡片。但有趣嘅係，Fans對於呢個消息嘅反應竟然係大多負評！

《MTG》日前於官方YouTube發佈一條不足一分鐘嘅短片，內容係講一個小朋友睇Marvel漫畫時有幾激動、漫畫故事有幾吸引，只能以「Magic」黎形容，畫面最後亦出現一張《MTG》卡，以此黎宣佈雙方合作。而睇返《MTG》官網嘅消息，目前亦只係話會與Marvel合作推出卡牌，當中會有各個Marvel英雄、反派。另外有報導指聯乘卡牌會於2025年先推出，反正到目前為止都淨係宣佈「會出」咁啫。

但條宣傳影片下嘅留言及反應就憑值得玩味。首先條片吸引到近50萬人觀看，證明消息有一定吸引力；但讚好影片嘅人只得約2,300個，負評嘅人就高達5,000個，可見一眾《MTG》Fans都唔太滿意今次聯乘。而當中第一個留言「由《Magic The Gathering》變成《Magic The Marketing》」就可謂直接了當地點出Fans們對於官方唯利是圖嘅不滿。但話雖如此，相信到卡牌真係見街之時，又會掀起一股新炒風。

資料來源：Magic The Gathering